Manmaw ginra Myen hpyen dap ni nbungli hte wa gap gasat
Manmaw ginra hta gumshem Myen hpyen dap ni nbungli, drone ni hte wa gap gasat ai lam chye lu ai.
August shata 13 ya jahpawt hkying 6:30am aten daram kaw nna, Manmaw ginra hta gumshem Myen hpyen dap ni Jet nbungli hte bawm (3) lang wa gap gasat ai rai nna, drone ni hte mung gap gasat ai lam, lit nga ai salang ni kaw na chye lu ai.
Gumshem Myen hpyen dap ni gaw August shata praw kawn, laknak arung arai hte masha n-gun htaw lung wa ai sanghpaw Manmaw ginra de du lung wa ai kaw nna, KIA pawng hpawm hpyen hpung ni htim gasat zing madu tawn ai shara ni de, shani shagu ngu na lagaw lam hku htim gasat nga ai sha n-ga nbungli, drone ni hte mung laja lana gap gasat nga ding yang re ai lam chye lu ai.
Matut nna Hpakant ginra hta mung, gumshem Myen hpyen ni shani shagu hpyen n-gun htu shadut shamu shamawt ai lam ding yang galaw nga ai majaw, KIA pawng hpawm hpyen hpung ni hte gasat gala majan jahkring hkring ngu na byin nga ai re.
Ya aten gumshem Myen hpyen dap ni gaw Manmaw, Hpakant hte Waimaw ginra ni hta hpyen n-gun jat, htu shadut ai lam ding yang galaw nga ai majaw, KIA pawng hpawm hpyen hpung ni hte shani shagu ngu na gasat gala majan byin nga ai lam matut chye lu ai.
