Manmaw ginra nbungli bawm a majaw mungshawa si hkala hkrum

Manmaw ginra gumshem Myen hpyen dap ni nbungli hte bawm wa jahkrat, gap gasat nga ai majaw mungshawa si hkala hkrum ai lam chye lu ai.

February shata 14 ya shana maga hkying 4:00pm aten daram hta Manmaw ginra Sing Hkan mare kaw gumshem Myen hpyen dap ni Jet nbungli hte bawm (3) lang wa jahkrat bun ai majaw, mungshawa marai (2) asak si sum nna, marai (3) hkala hkrum ai lam, ginra masha ni kaw na chye lu ai.

Asak si sum ai mungshawa yan gaw asak (40) re salang langai hte asak (30) re num hpawmi langai yan rai nna, hkala hkrum ai ni gaw asak (50) re salang langai, asak (12) re num kasha langai hte asak (22) re la kasha ni re lam chye ai.

Hkala hkrum ai mungshawa ni gaw ya aten tsi tsi hkamla nga ai rai nna, nbungli bawm a majaw mungshawa dum nta ni mung hten za mat ai lam chye lu ai.

Manmaw ginra hta February shata 14 ya shani du hkra, gasat gala majan laja lana matut byin nga ai rai nna, gumshem Myen hpyen dap ni gaw nbungli, drone ni hte gap gasat nga ding yang re ai lam chye lu ai.