Manmaw Ginwang Chyum Jawng a 2020-2021 hpaji ladaw hte seng nna ndau laika shapraw
Manmaw Ginwang Jinghpaw Wunpawng Hkalup Hpung Chyum Jawng (KBBS) a 2020-2021 hpaji ladaw hpe Covid-19 ana zinli a majaw, Myen Mung Asuya a jawng lung aten ladaw hpaw masat ai hta hkan nna hpaw sa wa na re lam, May shata 9 ya shani ndau laika shapraw da ai kaw na mu chye lu ai.
Manmaw Ginwang Chyum Jawng hpe May shata 30 ya shani kaw nna hpaw hpang na matu hkyen shajin nga ai raitim, Myen Mung Asuya hku nna hpaji jawng ni hpe hpaw na matu ahkang jaw dat ai hte rau hpaw sa na re lam, Manmaw Ginwang Chyum Jawng Up Sara Kaba Marip Gam Seng dan ai.
Jawng hta 4 ning lung ai L.Th program, 3 ning lu ai Diploma program, shata 6 chyum laika hkaja masing ni re. English, Computer hte Music special program nnan ni hpe gaw dai ning kaw nna hpaw hpang na re lam, sharin ladaw shata 2 rai nna tsang 10 awng sai jawngma ni hpe hkap la sharin ya na re lam, Sara Kaba matut tsun ai kaw na chye lu ai.
L.Th hte Diploma program hpe gaw jawng lung jarik laning mi hta kyats 750,000 (Sen Sanit Mun Manga) rai nna, shata 6 chyum laika hkaja masing gaw jawng lung jarik kyats 400,000 (Sen Mali) hte Special program hpe gaw kyats 250,000 (Sen lahkawng Mun Manga) masat da ai re.
Ya aten Manmaw Ginwang Chyum Jawng hta jawng mying hkap la hpang nga sai rai nna, KBC shang wang kata kaw na yawng hpe hkap la sharin ya ai re lam chye lu ai.
L.Th program hta gaw tsang 9 awng ai jawngma ni hpe hkap la sharin ya ai rai nna, Diploma program hta gaw tsang 8 awng sai ni hpe hkap la sharin ya ai re hte shata 6 chyum laika hkaja masing hta gaw chyum laika hkaja mayu ai ni yawng hpe hkap la sharin ya ai re lam chye lu ai.
Manmaw Ginwang Chyum Jawng gaw hpu-shawng hpu-ba sasana Sara Kaba ni shawng sa du ai lamu ga kaw hpaw ai chyum jawng re majaw, KBC shang wang kata na hpung masha ni yawng mung chyum laika wa sharin hkam la, jawngma ni dat ya let mungga hpe hkaja sa wa ga nga nna Sara Kaba kaw nna tsun lajin da ai re.
