Manmaw Ginwang Chyum Jawng yu hpawng galaw
(10) lang na Manmaw ginwang chyum jawng yu hpawng hpe March shata praw 1 ya jahpawt hkying 10:00am aten, Laiza kaw galaw la lu sai lam chye lu ai.
Jawng yu ai hte seng nna Manmaw ginwang chyum jawng Ningtau Jawng Up, Rev. Hpauyu Awng Ja tsun ai hta “Yakhkak ai lam gaw law law nga ai, shawoi hkan na hta dai ning gaw grau yakhkak ai, shara mung nnan re, shara htawt sit ai lam, hkawmsa hkawmwa, ja gumhpraw lam ni hta mung yakhkak nga ai” nga nna tsun ai.
Dai ning na jawng lung ladaw kaw jawngma yawng marai (19) jawng lung sharin hkamla nga ai hta jawng lung ladaw hpang jahtum shaning na jawngma marai (6) jawng yu la lu sai lam chye lu ai.
Manmaw chyum jawng gaw laiwa sai aten Manmaw Je-in kaw hpaw sharin ai rai nna, ya aten na mungmasa hpyen masa lam amyu myu a majaw, Laiza kaw bai matut wa hpaw sharin nga ai hta chyum jawng hpaw sharin ai (10) ning hpring sai hte jawng yu ai mung (10) lang na jawng yu hpawng re ai hpe chye lu ai.
