Manmaw Ginwang hpung woi magam gun ni a Chyum laika sharin bawngban hpawng galaw la ngut

13^th lang na Manmaw Ginwang hpung woi magam gun Sara/num ni a Chyum laika sharin bawngban hpawng hpe Manmaw Roberts Masat Htingnu kaw January shata 30 ya shani galaw la lu sai lam chye lu ai.

“Sharin hpawng galaw ai yaw shada lam gaw anhte ginwang kata kaw na magam gun ni shada da ga nawn mazum let, anhte kalang mi bai Sara kaba ni a mungga ni hpe jawm madat hkamla na nna, matut nna galaw sa wa na magam bungli ni hta n-gun hpring hpring hte galaw sa wa na matu re” nga nna MGZ Mu Na Kyitkai kaw na Sara Kareng Htoi Awng tsun ai.

Sharin hpawng hta Kuthkai Chyum Jawng Up Rev. Dr. Lahtaw Zau Awng kaw nna Shanglawt ai Karai Masa ngu ai ga baw hte sharin ya ai, Dr. Labya Roi San kaw nna Hkristu a lanang hkap lu hkra myit hkrum let gawgap ga ngu ai ga baw hte sharin ya ai rai nna, Rev. Dr. Jum Maw San Awng kaw nna Sasana Bungli na magam gun ni a sak hkrung shingni ngu ai ga baw hte sharin ya ai re.

Lakjet hku nna KBC Sara Magam Dap Hpa-awn Sara kaba Rev. Lashi Laja kaw nna Hpung woi shingni ngu ai ga baw sharin ya ai re hte Zinlum Hpung Up Rev. MSN. Jangmaw Gam Maw kaw nna Hkristu a lanang hkap lu ai ni tai ga ngu ai ga baw hte sharin ya ai re lam chye lu ai.

Sharin hpawng hta Manmaw Ginwang kata na buga hpung 43 kaw na hpung woi Sara/num ni yawng marai 160 jan sa du sharin hkamla ai lam chye lu ai.

Photo; Mgz Mu Na Kyithkai