Manmaw Ginwang Htunghking Manau shadung gawgap akyu hpyi hpaw hpawng galaw

Manmaw Ginwang Htunghking Manau shadung gawgap la lu na matu akyu hpyi ap ai hpaw hpawng lamang hpe October shata praw 1 ya jahpawt hkying 7:00am aten hta Manmaw Htunghking Manau Wang kaw galaw la lu sai lam chye lu ai.

Manmaw Ginwang Htunghking hte Laili Laika Hpung ni hte Myitkyina Jinghpaw Wunpawng Htunghking Hte Laili Laika Hpung Ginjaw ni grau grau makyit ngang wa lu na matu Jinghpaw Wunpawng Htunghking Hte Laili Laika Hpung Ginjaw kaw nna magun lit hte sa du n-gun jaw ai lam galaw ai rai nna, hpawng lamang hta manau shadung hkri dun panep galaw ai hte akyu hpyi hpawng lamang ni galaw ai re lam, Manmaw Ginwang Htunghking hte Laili Laika Hpung Ningtau Ningbaw, Manau Shadung Gawgap Komiti Ningbaw Salang Kareng Naw Tawng tsun dan ai.

Manau shadung gawgap ai lam hta ra ai arung arai ni jahkum shatsup la nna gawgap ai lam hpe shata 5,6 laman hta ngut hkre hkra matut manoi galaw sa wa na re lam, manau ka manawt ai shara wang hpe Pe 200 jan, manau shadung tsaw de Pe 50 jan gawgap na matu hkyen lajang nga ai lam chye lu ai.

Manau shadung gawgap akyu hpyi hpaw hpawng lamang hta Myitkyina Jinghpaw Wunpawng Htunghking Hte Laili Laika Hpung Ginjaw Salang ni, Manmaw mare uphkang salang ni, hpung woi sara ni hte buga hpung kanu kawa ni yawng marai 50 jan sa du shang lawm ai lam chye lu ai.