Manmaw Ginwang kaw, Gaw gap dingyang rai nga ai manau shadung hte seng nna Manmaw JLH ni zuphpawng kaba galaw la lu
Manmaw Ginwang, deng 2 Aungta mare lawk kaw gaw gap taw nga ai manau shadung hte seng nna January shata praw 9 hkying 9:00am aten kaw nna hkying 12:30pm aten du hkra, ginwang ting ra sharawng ai ningmu ni hpe tsun jahpra san lang ai zuphpawng kaba galaw la lu sai lam chye lu ai.
Zuphpawng hta buga shagu a shawang tsawra myit hte shara shagu kaw nna shang lawm mai ai ahkaw ahkang chyinghka hpaw ya ai lam hte seng nna, madung daw dan la lu sai re lam chye lu ai.
“Ginwang ting a bungli re majaw, Ginwang shagu de na dat kasa ni du let anhte ginwang a htunghking rawt jat galu kaba wa na matu hte ginwang kata na kaga myo mare ni de mung jawm gaw sharawt nna, n gun pawng let galaw la lu mat wa na matu daw dan bawng ban ai zup hpawng re lam,” Manmaw Ginwang Htunghking hte Laili laika Hpung Ningtau Ningbaw Salang Kareng Naw Tawng tsun ai.
Manmaw Ginwang Htunghking hte laili Laika Hpung kaw nna madung woi awn nhtawm Manmaw Ginwang, deng lahkawng Aungta mare lawk kaw htunghking masat ai manau shadung hpe 2020 ning December shata hta gaw gap hpang taw nga sai re.
Zuphpawng hpe Manmaw Ginwang Jinghpaw Laili Laika hte Htunghking hpung Ginjaw EC (JLH) kaw nna woi awn let Manmaw Ginwang kata na Man Win Gyi, Daw Hpum Yang, Man Je hte Nmawk, buga shagu na mungshawa ni yawng (100) daram sa du shang lawm bawng ban la lu sai lam chye lu ai.
