Manmaw, Hpakant ginra hta majan matut byin nga
Manmaw hte Hpakant ginra ni hta KIA pawng hpawm hpyen hpung ni hte gumshem Myen hpyen dap ni gasat gala majan matut byin nga ai lam chye lu ai.
March shata praw 6 ya shani hta Manmaw hpyen man, KIA pawng hpawm hpyen hpung ni shara la nga ai de, gumshem Myen hpyen dap ni htu shadut wa ai majaw, gasat gala majan byin nga ai lam, lit nga ai salang ni tsun ai.
Gumshem Myen hpyen dap ni gaw, nbungli, drone, laknak kaba ni hte gap gasat nga ding yang rai nna, KIA pawng hpawm hpyen hpung ni mung ninghkap gasat nga ai hta ya aten lahkawng maga hpyen masa shaja hkat nga ding yang re ai lam chye lu ai.
Hpakant ginra hta mung March shata praw 3 ya shani kaw nna, Hpakant Mashi Kahtawng akyu hpyi bum grup yin kaw KIA pawng hpawm hpyen hpung ni hte gumshem Myen hpyen dap ni gasat gala majan byin nga ai, dai ni hte rai yang 4 ya rai sai lam chye lu ai.
Ndai zawn gasat gala majan byin nga ai hta gumshem Myen hpyen dap gaw, gasat gala majan nbyin ai mungshawa ni nga ai shara hkan raitim, laknak kaba ni hkrup mara gap shadam ai lam ni galaw nga ai majaw, mungshawa hkra hkala hkrum ai hte dum nta htenza hkrum ai lam ni byin nga ai hpe chye lu ai.
