Manmaw, Hpakant ginra ni hta gasat gala majan laja nga
Manmaw hte Hpakant ginra ni hta KIA hte gumshem Myen hpyen dap ni gasat gala majan laja nga ai lam chye lu ai.
August shata praw 8 ya shani du hkra, Manmaw hte Hpakant ginra ni hta KIA pawng hpawm hpyen hpung ni hte gumshem Myen hpyen dap ni gasat gala majan laja nga ai hta gumshem Myen hpyen dap ni gaw nbungli, drone, laknak kaba hpan hkum hte gap gasat nga ding yang re lam, lit nga ai salang ni kaw na chye lu ai.
Gumshem Myen hpyen dap laknak arung arai hte masha n-gun htaw lung wa ai sanghpaw, Manmaw ginra du lung wa ai kaw nna August shata praw 7 ya shani du hkra, gumshem Myen hpyen dap ni gaw KIA pawng hpawm hpyen hpung ni gasat zing tawn da sai shara ni de, lagaw lam hku htu shadut htim gasat nga ai sha n-ga, nbungli, drone, laknak kaba hpan hkum hte mung gap gasat nga ai majaw, gasat gala majan laja nga ai lam chye lu ai.
Hpakant ginra hta mung, August shata praw 7 ya shani Hpakant Maw Wan Kaji mare kaw shara la nga ai, tatma (33) npu na gumshem Myen hpyen dap ni, Maw Wan Kaba mare maga de htu shadut lung wa ai majaw, Sut Bum mare makau kaw gasat gala majan byin ai hta Hpakant tatma kawng kaw nna mung, majan byin ai shara de laknak kaba gap garum ai sha n-ga, nbungli hte mung gap gasat garum ai lam chye lu ai.
Ya aten Manmaw hte Hpakant ginra ni hta gumshem Myen hpyen dap ni gaw, ladat amyu myu hte htu shadut htim gasat nga ai rai nna, KIA pawng hpawm hpyen hpung ni mung ninghkap htim gasat nga ding yang re ai majaw, lahkawng maga hpyen masa shaja hkat nga ding yang re ai lam chye lu ai.
