Manmaw hpyen man na Myen hpyen dap shara (3) hpe KIA pawng hpawm ni bai zing la lu
Oplus_131072
Gasat gala majan laja lana matut byin nga ai, Manmaw ginra na gumshem Myen hpyen dap shara (3) hpe KIA pawng hpawm hpyen hpung ni bai zing la lu sai lam chye lu ai.
October shata praw 9 ya jahpawt hkying 5:30am aten daram hta Manmaw ginra na gumshem Myen hpyen dap ni shara la nga ai, Deng (2, 3) na makawp dap shara (3) hpe KIA pawng hpawm hpyen hpung ni bai zing la lu sai lam, shawnglam lit nga ai salang ni kaw na chye lu ai.
Ndai shara gaw KIA pawng hpawm hpyen hpung ni gasat zing da lu ai hta gumshem Myen hpyen dap ni nbungli, drone, laknak kaba ni hte laja lana wa gap gasat ai majaw, gan hting nut da ai shara hpe dai hpawt bai gasat zing la lu ai re hpe chye lu ai.
October shata praw 9 ya shani ka-ang hkying 12:05pm aten daram hta Hpakant ginra, Malang Dung mare kaw gumshem Myen hpyen dap ni Jet nbungli hte bawm (2) lang wa gap gasat ai hta mungshawa hkra hkala ai lam nga nnga hpe nchye lu shi ai re.
October shata praw 8 ya shani hta mung, Waimaw Lamyang ginra na gumshem Myen hpyen dap hte P.T.Ts pawng hpawm hpyen hpung ni a shara (2) hpe KIA pawng hpawm hpyen hpung ni gasat zing la lu ai lam ni nga ai.
Gasat gala majan byin ai lam nnga ai shara Myitkyina lam kaba ntsa, Ga Ra Yang mare makau na Bri Bra mare hte Lung Zep kawng mayan hta mung, October shata praw 8 ya shani Jet nbungli hte bawm wa gap gasat ai lam, ginra masha ni kaw na chye lu ai.
