Manmaw hpyen man shara hta gasat gala majan matut laja nga
Manmaw hpyen man shara hta KIA pawng hpawm hpyen hpung ni hte gumshem Myen hpyen ni gasat gala majan matut laja nga ai lam chye lu ai.
Manmaw Tat Kale lawk makau kaw December shata praw 1 ya jahpawt hkying 6:00am aten daram hta KIA pawng hpawm hpyen hpung ni hte gumshem Myen hpyen ni gasat poi byin ai lam nga ai.
Dai hpang hkying 8:30am aten daram kaw nna, Hk.L.Y (47) dap makau, Bu De Wa mayan hta mung gumshem Myen hpyen ni shamu shamawt htu shadut wa ai majaw, KIA pawng hpawm hpyen hpung ni hte numdaw 3 lang laja lana gasat poi byin ai lam chye lu ai.
Gasat gala majan byin ai hta gumshem Myen hpyen dap maga, si hkala law ai majaw, Myen hpyen ni bai htingnut mat wa ai lam, shawng lam hpyen shiga lawk kaw na chye lu ai.
Ts.K.Hk (21) hte Namhpa Dakkasu jawng kaw nga ai gumshem Myen hpyen ni mung, laknak kaba hte grup gra shara de 19 lang gap shadam ai sha n-ga, nbungli hte sihkam drone hte ding yang bawm jahkrat gasat nga ai lam chye lu ai.
Waimaw Lamyang hpyen man maga de mung, KIA pawng hpawm hpyen hpung ni hte gumshem Myen hpyen pawng hpawm ni hpyen masa shaja hkat nga ding yang rai nna, aten ntam gasat gala majan matut byin wa mai ai lam, ginra masha ni tsun ai kaw na chye lu ai.
