Manmaw hpyen yen mungshawa ni yakhkak ai lam law nga
Manmaw ginra kata KIA hte gumshem Myen hpyen dap lapran gasat gala majan byin wa ai majaw, hpyen koi yen nga ai mungshawa ni yakhkak ai lam law nga ai hpe chye lu ai.
December shata praw 4 ya shani kaw nna, Manmaw hte Manje ginra kata KIA pawng hpawm hpyen hpung ni hte gumshem Myen hpyen dap lapran, gasat gala majan laja lana byin wa ai majaw, dai ginra na mungshawa ni hpyen koi yen nga ai hta malu masha nga shara, lang rung lang rai, bu hpun palang hte lu hka tsi mawan ni yakhkak nga ai lam, hpyen yen mungshawa ni kaw na chye lu ai.
Dai hpyen yen mungshawa ni gaw gasat gala majan laja wa ai majaw, madu shimlum dum ai shara de tinang hkum lawt daw hprawng koi yen wa ai hta shata lam rai wa sai majaw, yakhkak ai lam law wa ai hpe chye lu ai.
Ya aten Nmawk ginra hta mungshawa marai (11000) jan hte Daw Hpum Yang ginra hta marai (2800) jan koi yen nga ai rai nna, Manmaw hte Manje ginra ni hta mung, KIA pawng hpawm hpyen hpung ni hte gumshem Myen hpyen dap lapran shani shagu gasat gala majan laja lana matut byin nga ai lam matut chye lu ai.
