Manmaw hte Manje lapran laiwa laisa mung shawa ni hpe gumshem Myen hpyen ni jep joi nga

Manmaw hte Manje lapran laiwa laisa mung shawa ni hpe gumshem Myen hpyen ni March shata 30 ya shani kaw na kalang bai jep joi nga ai lam chye lu ai.

Kawng Ja Yang kaw shara mi, Si Aye mare shang wa ai kaw shara mi rai shara lahkawng kaw hkap jep nga ai. Ndai zawn hkap jep nga ai hta modo, cycle, arung arai ni hpe hkrawk jep nna, phone ni hpe mung yu jep ai lam ginra masha langai tsun ai.

Ndai zawn jep ai hta cycle gup chyawp, cycle gau hkang lai sin nlang yang myu de hkum shang, cycle hpang kaw kap ai sticker hpe myen gumhpraw 500 hta shawa rai, modo ni hpe mung jahkring jep nga ai lam ginra masha matut tsun ai.

Lai wa sai ten hta shata htum wa maga de jep ai lam ni galaw ai raitim, phone, arung arai jep ai lam nnga ai rai nna, ndai lang gaw phone arung arai, yawng hkrawk jep wa ai re lam chye lu ai.

March shata 27 ya shani kaw na Manmaw muklum kata cycle rim na lam ndau hkawm ai hpang, kalang bai lam de dingyang laiwa laisa mung shawa ni hpe jep nga ai re lam chye lu ai.