Manmaw maga de na lung wa ai gumshem Myen hpyen modo (26) hpung ni hpe KIA ni hkap gap gasat

Manmaw maga de na hpyen modo (26) hte lung wa ai gumshem Myen hpyen hpung ni hpe, August shata 29 ya jahpawt daw hkying 1:00am aten daram hta Myo Tit mahkrai kaw, KIA Masat (5) Dap Ba, Masat (25) hpyen hpung ni sinat kaba bawm ni hte hkap gap gasat ai lam chye lu ai.

KIA ni hkap gap gasat dat ai hpang, shimlam la ya na matu lagaw lam hte lung wa ai gumshem Myen hpyen hpung ni hpe Kung Law hte Law Pyi lapran kaw, bawm hte kalang bai hkap gap gasat ai lam nga ai.

Ndai gumshem Myen hpyen hpung ni gaw, Nam San Yang hpyen man maga de hpyen lang arung arai hte malu masha htaw lung wa ai rai nna, ya aten Numlang hpyen dap kaw du shang wa sai lam, shawng lam na lit nga ai salang ni tsun ai kaw na chye lu ai.

Mungmyit Sinli Ga (Kachin Sub-State), KIA Masat (6) Dap Ba, Masat (9) Dap Dung ginra hta mung, August shata 28 ya shani Man Nyu maga de na lung wa ai gumshem Myen hpyen n-gun (50) daram gaw, KIA ni shara la nga ai Bak Noi hte Loi Hpawng Kawng maga de gale pru wa ai majaw, gasat poi byin ai lam chye lu ai.

Gasat poi byin ai hpang, Namhpakka kaw dap jung nga ai gumshem Myen hpyen dap Hk.L.Y (123) dap ni kaw nna, gasat poi byin ai maga de sinat kaba hte gap bun ai lam, ginra masha ni kaw na chye lu ai.

August shata 29 ya dai hpawt hkying 10:30am aten daram hta mani na gumshem Myen hpyen hpung ni hte sha, KIA ni Bak Noi bum mayan kaw gasat poi matut byin ai rai nna, Hk.L.Y (123) dap ni kaw nna laknak kaba hte gap bun dingyang re lam na chye lu ai.

၎

င

၎

၎