Manmaw majan laja nga ai hta Myen hpyen dap ni nbungli drone hte ding yang gap gasat nga
Manmaw ginra gasat gala majan matut manoi laja nga ai hta gumshem Myen hpyen dap ni gaw, nbungli drone ni hte shani shagu ding yang gap gasat nga ai lam chye lu ai.
March shata 17 ya shana daw hkying 5:00pm aten daram hta MDY kaw na rawt lung wa ai gumshem Myen hpyen dap a nbungli, Manmaw Hkuli mare kaw bawm wa jahkrat bun ai majaw, mungshawa si hkala hkrum ai lam, ginra masha ni tsun ai.
March shata 16 ya shani hta mung, Manmaw St. Patrick Cathedral nawku jawng hpe gumshem Myen hpyen dap ni wan nat jahten kau ya ai sha n-ga, nbungli drone laknak kaba ni hte shani shagu gap gasat nga ai majaw, Manmaw ginra na mungshawa dum nta law law hten za hkrum nga ai hte mungshawa ni mung asak si sum nga ai re.
Shata (3) jan sai Manmaw majan hta gumshem Myen hpyen dap ni shani shana nbungli drone ni hte gap gasat nga ai rai nna, KIA pawng hpawm hpyen hpung ni mung, naw ngam nga ai Ts.K.Hk (21) hte dap shara nkau hpe matut htim gasat nga ding yang re ai hpe chye lu ai.
