Manmaw majan matut manoi naw laja nga

Manmaw ginra hta gasat gala majan matut manoi naw laja nga ai lam chye lu ai.

February shata 23 ya shani du hkra, Manmaw ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut manoi naw laja nga ai lam, shawnglam lit nga ai salang ni tsun ai.

Manmaw ginra gumshem Myen hpyen dap gaw, nbungli hte malu masha laknak arung arai ni htaw jahkrat ya nga ai sha n-ga, nbungli drone ni hpe madung jai lang let, ninghkap gap gasat nga ding yang re ai hpe chye lu ai.

Shata lahkawng jan sai Manmaw majan hta Manmaw ginra dap jung nga ai, gumshem Myen hpyen dap shara law malawng hpe KIA pawng hpawm hpyen hpung ni gasat zing la lu sai raitim, naw ngam nga ai Ts.K.Hk (21) hte dap shara nkau hpe matut naw htim gasat nga ding yang re ai hpe chye lu ai.

Gumshem Myen hpyen dap gaw, hpyen masa mungmasa lam amyu myu hta hkrat sum nga sai majaw, gasat gala majan nbyin ai shara, mungshawa law law nga ai shara ni hpe gap masat tawn let, nbungli drone ni hte hkrup mara gap gasat ai lam ni galaw nga ai re.