Manmaw, Manje ginra gasat gala majan matut laja nga
KIA Masat (3) Dap Ba Manmaw, Manje ginra ni hta gasat gala majan laja lana matut byin nga ai lam chye lu ai.
December shata 30 ya shani du hkra Manmaw, Manje ginra hta KIA pawng hpawm hpyen hpung hte gumshem Myen hpyen dap ni gasat gala majan laja lana matut byin nga ai lam, lit nga ai salang ni kaw na chye lu ai.
Gasat gala majan laja lana matut byin nga ai hta gumshem Myen hpyen dap gaw nbungli, Drone ni hpe madung dat let shani shagu ngu na gap gasat nga ai hpe chye lu ai.
Ndai zawn laja lana gap gasat nga ai hta mungshawa dum nta ni lani hte lani hten za ai lam law nga ai rai nna, dai ginra na mungshawa ni mung hpyen koi yen ai shata mi rai wa sai re.
KIA pawng hpawm hpyen hpung ni Manmaw, Manje ginra lu la hkra December shata praw 4 ya shani kaw nna, laja lana htim gasat wa ai hta dap shara law malawng hpe padang dip zing la lu sai hte naw ngam nga ai dap shara ni hpe matut htim gasat nga ai lam chye lu ai.
Gasat gala majan byin ai shata mi ram na wa sai hta gumshem Myen hpyen dap maga na si hkala law ai hte laknak jahkrat ai lam ni law nga ai rai nna, ya aten du hkra lahkawng maga hpyen masa matut shaja hkat nga ding yang re ai lam chye lu ai.
