Manmaw Manje ginra shani shagu majan matut laja nga

Manmaw hte Manje ginra ni hta shani shagu gasat gala majan laja lana matut byin nga ai lam chye lu ai.

January shata praw 6 ya jahpawt hkying 5:00am aten daram kaw nna, Manmaw Manje ginra, KIA pawng hpawm hpyen hpung ni hte gumshem Myen hpyen dap ni gasat gala majan laja lana bai byin nga ai lam, lit nga ai salang ni kaw na chye lu ai.

Gasat gala majan byin nga ai hta gumshem Myen hpyen dap kawn, nbungli drone laknak kaba ni hpe madung dat let, gap gasat nga ai sha n-ga, lahkawng maga shani shagu gasat gala majan matut byin nga ai lam chye lu ai.

Laiwa sai December shata praw 4 ya shani kaw nna, Manmaw Manje ginra ni hta gasat gala majan byin nga ai shata mi jan wa sai hta gumshem Myen hpyen dap shara law malawng hpe KIA pawng hpawm hpyen hpung ni zing madu la lu sai raitim, zep zi zing madu la lu hkra matut htim gasat nga ding yang re hpe chye lu ai.

Matut nna KIA Masat (9) Dap Ba, Masat (26) Dap Dung, Se Zin ginra hta SNA (Sam hkyeng P.T.Ts) hpyen hpung ni htu shadut lung wa ai majaw, gasat gala majan byin nga ai rai nna, Waimaw ginra hta mung KIA hte gumshem Myen hpyen dap lapran hpyen masa shaja hkat nga ai lam chye lu ai.