Manmaw Myawk dap hpe KIA matut zing

Manmaw ginra dap jung nga ai gumshem Myen hpyen myawk dap hpe KIA matut zing la lu sai lam chye lu ai.

February shata praw 2 ya shana maga hkying 4:40pm aten daram hta Manmaw gumshem Myen hpyen Masat (366) myawk dap hpe KIA pawng hpawm hpyen hpung ni matut htim gasat zing madu la lu sai lam, lit nga ai salang ni tsun ai.

Gumshem Myen hpyen dap Ts.K.Hk (21), Masat (366) myawk dap, Hk.L.Y (236) dap hte Kan Daw laika sharin jawng kaw shara jahkrat nga ai gumshem Myen hpyen dap ni hpe KIA pawng hpawm hpyen hpung ni dai hpawt hkying 5:30am aten daram kaw nna htim gasat wa ai hta myawk dap hpe shawng zing madu la lu ai re lam chye lu ai.