Manmaw Nmawk hpyen yen mungshawa ni grau yakhkak wa

Manmaw Nmawk ginra hkan na hpyen koi yen nga ai mungshawa ni mi na hta grau yakhkak wa ai lam chye lu ai.

Manmaw ginra gasat gala majan laja lana matut byin nga ai hta dai ginra na mungshawa ni, hpyen koi yen ai shata lahkawng jan na wa sai majaw, nga shara malu masha lang rung lang rai, lu hka tsi mawan ni, mi na hta grau yakhkak wa ai sha n-ga, tam lu tam sha hkawmsa hkawmwa lam shagu hta mung, grau yakhkak wa ai lam hpyen yen mungshawa ni tsun ai.

Ya aten Manmaw Nmawk ginra na mungshawa ni gaw, Sinpraw Ginwang Ginjaw, Manmaw Ginwang, Nmau Ginwang Ginjaw hte Shwegu Ginwang hkan law malawng hpyen koi yen hkawm nga ai lam chye lu ai.

Manmaw ginra hta laiwa sai December shata praw 4 ya shani kaw nna, KIA pawng hpawm hpyen hpung ni hte gumshem Myen hpyen dap ni gasat gala majan byin ai shata lahkawng jan sai raitim, February shata 10 ya shani du hkra, lahkawng maga hpyen masa matut naw shaja hkat nga ding yang re hpe chye lu ai.