Manmaw, Nmawk hte Manje makau grup yin na gumshem Myen hpyen dap shara ni hpe KIA ni htim gasat nga
KIA Masat (3) Dap Ba ginra rai nga ai, Manmaw, Nmawk hte Manje makau grup yin dap jung shara jahkrat nga ai, gumshem Myen hpyen dap shara ni hpe KIA ni htim gasat nga ai lam chye lu ai.
May shata praw 7 ya jahpawt hkying 5:00am aten daram kaw na Manmaw, Nmawk hte Manje makau grup yin ni hta dap jung shara jahkrat nga ai, gumshem Myen hpyen dap shara 10 jan hpe KIA pawng hpawm hpyen hpung ni kalang ta htim gasat nga ai lam, lit nga ai salang ni kaw na chye lu ai.
Gumshem Myen hpyen dap ni shara jahkrat nga ai, Sinhkan maga de shara 6, Manje maga de shara 5, Nmawk maga de shara 3 rai, htim gasat nga ai hta dap shara nkau hpe padang dip la lu sai rai nna, ngam nga ai dap shara ni hpe matut htim gasat nga ai lam chye lu ai.
Ndai zawn KIA pawng hpawm hpyen hpung ni laja lana htim gasat nga ai hta gumshem Myen hpyen dap maga sum machyi ai lam law wa ai majaw, nbungli bawm, laknak kaba ni hte mare kata hkan hkrup mara gap bun nga ai lam, Manje ginra masha langai tsun ai.
