Manmaw, Nmawk, Manje ginra ni hta gasat gala majan matut byin nga
Manmaw, Nmawk hte Manje ginra ni hta KIA hte gumshem Myen hpyen dap lapran gasat gala majan laja lana matut byin nga ai lam chye lu ai.
May shata praw 7 ya shani kaw na Manmaw, Nmawk hte Manje ginra ni hta dap jung nga ai gumshem Myen hpyen dap shara ni hpe KIA pawng hpawm hpyen hpung ni htim gasat hpang wa ai gaw, dai ni du hkra gasat gala majan laja lana naw matut byin nga ai lam chye lu ai.
Gasat gala majan laja lana byin nga ai hta gumshem Myen hpyen dap nbungli bawm, laknak kaba ni hte hkrup mara gap bun nga ai majaw, Nmawk hte Manje mare na mungshawa nkau asak si sum, hkala hkrum ai rai nna, dum nta ni mung wan hkru hten za hkrum ai lam chye lu ai.
Ndai zawn KIA hte gumshem Myen hpyen dap lapran hpyen masa shaja hkat nga ai hta May shata praw 8 ya shana Myitkyina, Manmaw lam kaba ntsa, Dabak hka mahkrai hpe Shwe Nyawng Pin gumshem Myen hpyen Hk.L.Y (321) dap ni wa kapaw jahten kau ai lam, ginra masha ni kaw na chye lu ai.
