Manmaw Pyinsin Kawng na mare masha ni hpyen yen dabang na salang langai hpe jawm adup
Manmaw Robert hpyen yen dabang jahkrai la Border kawng hta nga ai, Salang Lahpai Zau Hkun Sa hte Kanu Mwihpu Hkawn Nau yan nu hpe June shata 10 ya shana de hkying 6:00pm aten daram hta Mannaw Pyinsin Kawng na masha 12 hpung ni sa adup zingri da ai lam na chye lu ai.
Ya na zawn adup zingri hkrum ai mabyin hte seng nna Robert hpyen yen dabang na Salang langai tsun ai hta “June 9 ya shana de hpyen yen dabang na gawdin pa kaw gawdin ginsup ai shaloi Byinsin Kawng na Ramma Ying Ting ngu ai la kasha hte hpyen yen na Shadang Brang San gaw Goal shang ai nshang ai lam hpe tsun dang rang hkat nna mang hkang byin ai. Ying Ting gaw myit ndik ai majaw June 10 ya shana de hkying 6:00pm aten daram hta mare masha marai 12 hpe woi nna hpyen yen dabang de sa wa ai Brang San hpe nmu jang shanhte ga law hkat ai shaloi sa je lawm ai Salang Lahpai Zau Hkun Sa nhku kaw dung nga ai mu jang ndai wa mung lawm ai ngu nna kalang dat jawm adup abyen wa ai hpe Salang Lahpai Zau Hkun Sa a kanu mu jang hpa baw ra ai, hpa baw byin ai, ngai kanu nga ai ngu tsun yang kanu a hkra lata kaw hpun tawng hte adup hkra ya nna nra brep mat ai” nga nna Salang wa tsun ai.
Ndai amu hte seng nna June 11 ya shani hta hpyen yen dabang na lit nga ai Salang ni, Pyinsin Kawng na mare Salang ni hte Balik ni mare rung kaw amu hpe tsun hkat ai shaloi dai kaw hparan ya ai Salang wa gaw adup hkrum ai hpawmi jan hpe nang na gam maka rai sai nga nna tsun ya ai. Anhte byin shangun mayu ai lam gaw shawa sha na matu nre. Nta kaw sa nna ra ai lam hpe kaji kachyaw jawm myit shapyaw hkat na matu ra sharawng ai raitim, adup ai masha ni mung anhte gumhpraw njaw lu ai nanhte myit ndik jang gara de mung shawk mu nga ja ja nga chyu tsun ai, kaga de shawk timmung mang hkang gaw ngut na nre matut nna naw byin wa chye ai dai hpe mu mada ai majaw shanhte anhte kaw nsa timmung myit shadik kau ai, dabang na ma ni hpe manghkang bai nbyin na matu shadum jahprang nga ga ai manghkang bai byin wa na hpe tsang ai lam, Salang matut tsun ai.
Adup hkrum ai Salang Lahpai Zau Hkun Sa gaw grai sawng ai lam nnga ai raitim kanu gaw hkra lata nra brep mat ai re. Nta kaw nga let bum tsi tsi hkam la nga ai rai nna, hkrat ang ai tsi manu hpe gaw dabang kaw nna lit la ya nga ai lam chye lu ai.
Lai wa sai 2017 ning hta mung, Robert hpyen yen dabang na ramma la kasha langai hpe Pyinsin Kawng na ramma ni hte Jinghpaw Jut na ramma ni shanhte nan sa shaga woi mat nna du kadoi sat kau ya ai lam ni byin lai wa sai re. Ndai amu hte seng nna Asuya ning htawn rung Ginwang rung de lang hte lang laika tang shawk shawn da sai raitim daini du hkra hpa mahtai mung npru wa ai lam, Robert hpyen yen masha ni kawn chye lu ai.
