Manwing kaw Jinghpaw Mungdaw masat ninghtoi hpawng galaw
Manwing kaw Jinghpaw Mungdaw masat ninghtoi hpawng galaw ai lam chye lu ai.
January shata 10 ya shani (77) lang na Jinghpaw mungdaw masat ninghtoi hpawng lamang hpe Manwing lahta tsang jawng hte KBC nawku jawng wang kaw galaw ai lam, ginra masha langai tsun ai.
KBC jawng wang kaw galaw ai hta Manwing buga hpung a hpung up Rev. Maran Zau La kawn, Jinghpaw mungdaw byin pru wa ai labau hpe tsun hkai dan let, lahta tsang jawngma ni mung, Jinghpaw mungdaw masat ninghtoi hpe shagrau ai hku nna, manau nau ai lam ni hpe galaw ai lam, ginra masha matut tsun ai.
Matut nna (77) lang na Jinghpaw mungdaw masat ninghtoi hpe gumshem Myen hpyen dap ni woi awn let, Myitkyina mungdaw uphkang rung wang kaw shimlam la shara jahkrat da rai nna, galaw nga ai lam chye lu ai.
Jinghpaw mungdaw masat ninghtoi hpe laiwa sai 1948 ning January shata 10 ya shani hta Jinghpaw mungdaw ninghtoi ngu masat let, Myitkyina Muklum manau wang kaw manau nau lai wa ai, dai ning 2025 ning January shata 10 ya shani hta gaw (77) lang na Jinghpaw mungdaw masat nhtoi re hpe chye lu ai.
