Ga shingbut gyi ai majaw lung seng tam masha 1 si, 2 hkala hkrum
Hpakant, Lawnghkang Rap, Marau mare Ti Yaw Mani (သိေရာမဏိ) lung seng company kaw na pe 80 daram tsaw ai ga shingbut gyi wa ai majaw, November shata 20 ya shani hkying 1:00pm aten hta lung seng tam masha marai 1 si, 2 hkala hkrum ai lam na chye lu ai.
Ga shingbut gyi ai hta, U Zaw U asak (25) ning gaw asak si sum mat sai rai nna, U Soe Nge asak (24) ning hte U Kyaw Gyi asak (29) ning yan gaw hkala hkrum ai majaw, ya aten Lawnghkang tsi rung kaw tsi tsi hkam la nga ai rai nna, Mawtsiza mare kaw na re lam chye lu ai.
Shingbut gyi kaput hkrum ai U Zaw U a hkum tsawp moimang hpe shana maga hkying 3:10pm aten hta lu shaw la ai lam chye lu ai.
COVID-19 aten ladaw hta tam lu tam sha yak hkak ai majaw, tinang a asak hpe n yu ai sha galaw lu galaw sha ai majaw, ya na zawn mabyin manghkang ni jahkring hkring byin ai re lam, Salang Tsam Zau Mai tsun dan ai.
Marau mare kaw ga shingbut gyi nna masha asak si, hkala hkrum ai gaw ndai lang shawng nnan byin ai re lam chye lu ai.
Photo Credit; Myitkyina News Journal
