Masat (1) Dap Nawng Daju hta laknak kaba matut manoi gap bun

KIA Masat (1) Dap Nawng Daju ginra hta March shata 16 ya jahpat daw hkying 9:51am aten kaw nna, gumshem Myen hpyen dap ni sinat kaba hte matut manoi gap bun ai lam chye lu ai.

Gumshem Myen hpyen dap ni nga ai Kin Sa Kawng kaw jahpawt maga hkying 7:5am aten laman ga ganaw modo hte laknak kaba gap na shara galaw la rai nna, Kin Sa Kawng ntsa grup yin Drone shapyen da nhtawm, KIA ni nga ai U Hkai Hkyet post maga de Wa Byen Bum kawn laknak kaba 120mm (25) lang, 105mm (20) lang, Pung Ling dap kawn 60mm (4) lang, Kin Sa Kawng kawn 60mm (150) lang, RPG (40) lang, 79mm (70) lang gap bun ai lam chye lu ai.

Laknak kaba hte ma ja gap bun nga ai majaw U Hkai Hkyet post kaw nga ai Masat (1) Dap Nawng Daju, Masat (251, 253) Dap Dung na pawng hpawm hpyen hpung ni post kaw rawng nga nmai wa ai majaw hting nut kau da sai lam chye lu ai.