Masat (12) Dap Dung ginra hta gasat gala majan matut byin
KIA Masat (3) Dap Ba, Masat (12) Dap Dung ginra hta January shata 15 ya shani hkying 1:40pm aten, KIA hte gumshem Myen hpyen dap ni gasat gala majan matut byin nga ai lam chye lu ai.
Gasat gala majan byin ai gaw Je Hkam kaw nna rawt lung wa ai Hk.L.Y (223), Hk.M.Y (348) dap na pawng hpawm hpyen hpung ni rai nna, hpyen n-gun (70) daram hte Je Hkam hte Nam Lim Pa lapran kaw gasat gala majan byin ai lam, lit nga ai salang ni kaw na chye lu ai.
Gumshem Myen hpyen dap ni hpyen shamu shamawt lung wa ai kaw KIA ni hkap gap ai kawn, gasat gala majan byin wa ai rai nna, January shata 14 ya shani hta mung, Man Ta hte Tan Tada lapran Man Na makau kaw, KIA hte gumshem Myen hpyen dap ni gasat gala majan byin ai lam chye lu ai.
KIA Masat (10) Dap Ba, Masat (2), (17) Dap Dung ginra ni hta mung, KIA hte gumshem Myen hpyen dap ni gasat gala majan byin ai lam ni nga ai rai nna, KIA ni dap jung shara jahkrat nga ai shara ni hta gumshem Myen hpyen dap ni hpyen shamu shamawt nga ai lam chye lu ai.
