Masat (24) Dap Dung ginra gasat gala majan byin

KIA Masat (5) Dap Ba, Masat (24) Dap Dung ginra hta February shata praw 6 ya shani hkying 1:30pm aten daram kaw na KIA hte gumshem Myen hpyen dap ni gasat gala majan byin nga ai lam chye lu ai.

Ntap Bum kaw na yu wa ai gumshem Myen hpyen dap, Hk.L.Y (236) dap kata na hpyen hpung ni, Na Lung hte Shadan Pa mayan kaw hpyen shamu shamawt nga hkawm ai ten, KIA hte ang katut gasat gala majan byin ai re lam, lit nga ai salang langai tsun ai.

Gasat gala majan byin nga ai hta Hpun Pyen Bum kaw dap jung nga ai gumshem Myen hpyen dap ni gasat gala majan byin nga ai shara de, 120mm, 81mm ngu maram lu ai laknak kaba ni hte gap bun nga ai re lam, salang wa matut tsun ai.

KIA hte gumshem Myen hpyen dap lapran gasat gala majan byin nga ai hta hpyen masa gara hku naw rai nga ai hpe matut nna sagawn nga ding yang re.