Masat (3), (5) hte Masat (9) Dap Ba Ginra ni hta gasat gala majan byin
Masat (3) Dap Ba, Masat (12) Dap Dung Ginra, Hti Chyai-Jawng kawng lam mazup kaw June 26 ya jahpawt hkying 3:15am aten hta lawu mung kawn lung wa ai Gumshem Myen hpyen Modo hpung hpe KIA hpyen hpung ni hkap gap ai kawn gasat poi byin ai lam chye lu ai.
Masat (12) Dap Dung Ginra, Pawk Kung mare lahta kaw mung Katha maga kawn lung wa ai Gumshem Myen hpyen dap ni a Sanghpaw hpe KIA hpyen hpung ni kawn 107mm hte hkap gap bun ai lam nga ai re.
Masat (27) Dap Dung Ginra, Gaw Ngu Yang kaw shara la nga ai Hk.M.Y (424) dap ni kawn June shata 26 ya jahpawt hkying 5:22am aten kaw nna hkying 6:22am aten laman, Nam Hka Bum maga de (40mm) hte numdaw (4) lang, (79mm) hte numdaw (15) lang gap shadam bun ai lam nga ai re hpe mung chye lu ai.
Shana daw hkying 3:00pm aten kaw nna hkying 3:15pm aten laman hta mung, Gaw Ngu Yang maga kawn lung wa ai Hk.L.Y (250) dap na n-gun (50) daram nga ai Gumshem Myen hpyen hpung ni hpe KIA hpyen hpung ni, Sama Pa Lahta Bang Gaw-Man Lep mare lawu Sa Ra Kawng kaw hkap shingla gasat ai kawn gasat poi byin ai re.
Ginjaw Ginra, Masat (5) Dap Ba, Masat (25) Dap Dung Ginra, Naing Oo kadawng mayan kaw, hkying 6:18am aten hta HK.M.Y (487) kata na hpyen hpung ni kawn (105mm) ngu maram lu ai sinat laknak kaba hte numdaw (3) lang gap bun ai lam nga ai re hpe chye lu ai.
Uru Seng Maw Ginwang, Masat (9) Dap Ba, Masat (6) Dap Dung Ginra, Hpakant maw ginra hta mung shawa n-gun (2000) daram hte Gumshem myen hpyen dap hpe nra sharawng ai lam n-gun madun ai re hpe mung matut chye lu ai.
