Masat ( 5 ) Dap Ba daju party komiti kawn woi awn nna Num/La Gawdin, Tadin hte U mun ginsup shingjawng ai hpaw poi lamang galaw
Masat ( 5 ) Dap Ba daju party komiti kawn woi awn nna 59th ning hpring KIO ( Wunpawng Mungdan Shanglawt Hpung ) masat nhtoi hpe shagrau sha a ai hku nna Num, la Gawdin, tadin hte U mun shingjawng ai hpaw poi lamang hpe October shata praw 5 ya shana daw hkying 2:30pm aten hta Masat 5 Dap Ba daju kaw galaw ai lam chye lu ai.
Ginsup shingjawng poi lamang galaw ai yaw shada lam hpe Ginsup Komiti Ningbaw Salang Kaba Maran Brang Nan kaw nna ya na zawn tsun ai. “Wunpawng mungdan shanglawt hpung 59th ning hpring nna 60th ning de du shang wa ai masat nhtoi hpe shagrau sha a ai hku nna, party komiti kaw nna woi awn sa wa ai hte maren, mungchying mungshawa ni, dap shawa ni yawng shanglawm wa lu na matu, Wunpawng mungdan shanglawt hpung a woi awn sa wa ai hta magam dap shara shagu hkan magam gun nga ai ni hte mungchying mungshawa ni grau nna madi shadaw shang lawm ai hte lahkrip ra ra tsap nga ga ai ngu ai hpe madi madun hkrang shapraw ai re hte wunpawng mungdan shanglawt hpung hta mungdan amyu masha ni hpung shang masha hku nna shanglawm madi shadaw ai ni grau nna law htam wa na matu, ginsup ai hte anhte a myit marai hpe bai gawgap la lu na matu hte ntsa na matsun kata kaw magam bungli hpe lahkrip ra ra n-gun da ting nna galaw sa, tsap sa wa lu na matu hte ginsup ai hte tinang a hkum hkrang hkam gaja lam grau nna gawgap la lu na matu, htawm hpang na, kahpa bai galai na ramma kaji ni hpe mung ginsup ai hte hkumhkrang hkamja lam, myutsaw myit, tinang a atsam marai hpe bai gawgap la lu ai hkringhtawng jaw mat wa na matu yaw shatawng shada ai re” nga nna tsun ai.
Ginsup hpan ni gaw La gawdin, Num gawdin hte ramma ni hpe tadin rai nna, sak ram, sak kung ni hpe U mun ginsup shingjawng ai lamang hpan 3 hku nna ginsup shingjawng ai lam galaw sa wa na re hpe chye lu ai.
Ginsup shingjawng lawm ai ni gaw Dap Ba kaw nga ai magam gun hpyen la ni hpung mi, magam gun hpyen num ni hpung mi, Dap Ba daju gawdin hpung, Hpunlum yan hpyen yen dabang gawdin hpung, Alen Bum Lahta tsang jawng gawdin hpung, Je Yang hpyen yen dabang gawdin hpung, Jahtu kawng hte Mung Seng yang pawng ai gawdin hpung, Woi Chyai hpyen yen dabang gawdin hpung ni rai nna, la gawdin hpung 6 hte num gawdin hpung 5 re lam chye lu ai.
Ndai zawn hpawng lamang ni hpe Wunpawng Mungdan shanglawt hpung masat nhtoi du shagu galaw ai re. Daini ginsup shingjawng ai hpaw poi lamang hta Hpunlum Yang hpyen yen dabang ginsup hpung ni hte Alen Bum Jawng ginsup hpung ni shanglawm shingjawng ai rai nna, ginsup hpan amyu myu hte shingjawng ai lamang hpe October 25 ya shani du hkra matut manoi galaw sa wa na re lam chye lu ai.
