Masat (9) Dap Ba ginra hta KIA hte Myen hpyen dap ni gasat gala majan byin
Uru Ginwang Ginjaw, Masat (9) Dap Ba, Masat (44) Dap Dung ginra, Gin Si mayan kaw, June 15 ya shani hkying 7:50am aten hta Gumshem Myen hpyen dap hte KIA hpyen hpung ni gasat gala majan byin ai lam shawng lam shisawk ni kaw nna chye lu ai.
“Masat (44), (9) hte (6) Dap Dung, pawng hpawm hpyen hpung ni shara la nga ai Gin Si mayan kaw, Lawng Hkang Bawm Yam Dap kaw nna shamu shamawt yu wa ai Myen hpyen dap Hk.M.Y (111) dap na n gun (60) grup yin hpyen hpung ni hpe KIA pawng hpawm hpyen hpung ni, ninghkap gasat ai majaw gasat gala majan byin ai re” nga nna shawng lam kaw na Salang langai tsun dan ai.
Gasat gala majan byin ai hta Myen hpyen dap Nam Jan Hku kaw nna laknak kaba, 82mm hte numdaw (2) lang gap bang ai lam nga ai rai nna, sinat kaji ni hte mung majoi gap shadam ai lam nga ai re.
Uru Ginwang Ginjaw, Masat (9) Dap Ba ginra hta malu masha htaw shalai ai lam, sinat laknak htaw shalai ai hte hpyen n gun jat jahpring ai lam, shani shagu nga ai re hpe shawng lam shisawk ni tsun dan ai kaw nna chye lu ai.
