Masat (9) Dap Ba ginra hta Myen hpyen dap kawn sinat laknak kaba gap bun
Uru Ginwang ginjaw, Masat (9) Dap Ba, Masat (44) Dap Dung gira hta, Gumshem Myen hpyen dap ni kawn mare masha ni nga ai shara de sinat laknak kaba hte gap shadam bun ai lam nga ai re hpe shawng lam shi sawk ni kaw nna chye lu ai.
Nam Ya mare hta dap jung nga ai Hk.M.Y (12) kata na hpyen hpung ni gaw July shata 16 ya shani hkying 3:40pm aten hta sinat laknak kaba 82mm hte Manaw Maw maga de numdaw (3) lang gap bun ai rai nna, hkying 3:50pm aten hta mung Hkum Tsai Zup mare KBC kyu hpyi bum mayan hta shara jahkrat nga ai Myen hpyen dap ni kawn Microwave maga de sinat laknak kaba 60mm hte numdaw (4) lang gap bun ai re hpe chye lu ai.
Nam Ya mare hta shara jahkrat nga ai Hk.M.Y (12) dap na Maj. Myu Swi Lat kawn, KIA hpyen hpung ni mare hte maw kata pru pru shang shang galaw ai raitim, shiga njaw ai re majaw Sabaw mare hpe wan nat kau na ngu, mare na komiti salang ni hpe tsun jahkrit ai lam nga ai nga nna ,shi sawk ni matut tsun dan ai kaw nna chye lu ai.
