Masat yan ( 1 ) lawu tsang jare wunkat yu hpawng galaw

Ginjaw rung Party Komiti kawn woi awn galaw ai Masat yan ( 1 ) lawu tsang jare wunkat yu hpawng hpe Laiza Muklum, Padang Rung gawknu kaw August shata 28 ya jahpawt hkying 6:30am aten kaw nna hkying 8:00am aten du hkra galaw ai lam chye lu ai.

Shawng nnan hpawng hpaw mungga hpe ya na zawn tsun ai. “Kung kyang ai rung jare magam gun langai byin tai lu na matu gaw Magam dap a masa hpe mai byin ai made chye na hkawn hkrang ra ga ai, shanglawt asuya magam dap yawng hte tinang magam dap hpaw shabawn hkrang, Rung hpaw shabawn ai lam, magam gun hpaw shabawn ai lam, laika ka ai lam kung kyang ra ai, jahpan chyarang kung kyang ra ai hte rung magam lit hkri dun masa chyena kung kyang ra ai. Ndai lam ni hpe chye na hkawn hkrang ai hte tinang ang ai rung hta rung jare magam lit ni hpe hkrak tup hkan nang hkan sa galaw sa wa ai rai yang greng grak ai rung byin tai wa lu na re” nga nna Salang Kaba Labya Awng Ji tsun ai.

Jawng yu hpawng mungga hpe gaw Ginjaw Rung Party Komiti Tingnyang Up, Dukaba Ura Naw Tawng tsun ai hta Jare wunkat hpaw ai lam gaw Ginjaw Rung Party Komiti kata kaw na Komiti hte rau Kongsi a kata na jare magam bungli ni yawng hpe tatut shang galaw ding yang rai nga ai magam gun ni nga ai zawn, bungli garai nshang yu ai, ya tatut shang sa wa na rai nga ai magam gun kanau kasha ni yawng lawu tsang jare wunkat ningpawt ninghpang hpe chye gring chye ra ai ngu yaw shatawng shada nna wunkat hpe hpaw sa wa ai re lam tsun ai.

Masat yan ( 1 ) lawu tsang jare wunkat hpe August shata 7 ya jahpawt hpaw sharin hpang nna August 24 ya jahpawt du hkara, nhtoi 14 tup sharin ya ai. Madung sharin ya ai gaw rung kata na hpung hte seng ai lam, Magam dap a hpaw shabawn hkrang, Rung hpaw shabawn ai lam, Rung magam lit hkri dun hkrang, Rung laika, Masha jahpan galaw ai hte seng ai lam, chye gring chye mai ai lam, Up hkang sa manga, Rung ( staff )  langai a greng grak lam ni hpe sharin ya ai lam chye lu ai.

Lawu tsang jare wunkat hpe ngut hkre hkra sharin hkam la ai jawngma marai 30 hpe ginjaw rung party komiti kaw nna jawng yu masat masa lak mat shagrau ai lam galaw ai re.

Dai hpawt na lawu tsang jare wunkat jawng yu hpawng hta Ginjaw rung party komiti kata na rung magam gun ni, Party dinggrin salang ni hte lawu tsang jare wunkat jawngma ni yawng marai 40 jan sa du shang lawm ai lam chye lu ai.