Masat yan ( 10 ) Hpa-awn shalat jawng yu hpawng galaw
KIO Mungchying Uphkang Magam Dap kaw nna woi awn nhtawm, masat yan 10 hpa-awn shalat jawng yu hpawng lamang hpe, March 16 ya jahpawt hkying 8:00am aten hta Alen Bum Hpung Wa Gawknu hta galaw ai lam chye lu ai.
Dai ni jawng yu ai uphkang du ni gaw, La marai 63 Num marai 5 yawng marai 68 tup re. Jawng nnan lung hpang ai shaloi gaw jawngma yawng marai 83 re hta nkau gaw hkamja lam nnga ai, tara hkansa lam hta ning ra ai, laika ndep ai zawn re ni hpe rung de bai nhtang ap kau ai re lam, Mungchying Uphkang Dap Amu Madu Salang Kaba Nhkum Gam Awng tsun ai.
Sharin ladaw hpe laiwa sai masat yan 1 kaw nna masat yan 9 du hkra gaw laning mi sharin achyin lam galaw ai rai nna, masat yan 10 kaw nna gaw sharin achyin ladaw hpe lahkawng ning bai sharin ai hta ndai masat yan 10 ni gaw shawng ningnan lang na jawng yu ai ni re hpe chye lu ai.
Mungchying Uphkang Magam Dap Lit Hkam Salang Kaba Labya Tang Gun kaw nna mung, jawng yu sai uphkang du ni hpe ra mara numhtet numra mungga tsun ai.
Ningbaw Malai ( I ) Du Kaba Sumlut Gun Maw kaw nna mung, hpaji jaw mungga tsun ai hta, “ Anhte galoi mung dum nga ra ai gaw, mungshawa ni hpe woi awn ai shaloi mungshawa ni hpabaw hpe raq nga ai, hpabaw hpe ra nga ai ngu ai hpe yu nna woi awn ra ai, tinang myit ra ai de woi awn ai baw hkrang nbyin hkra myit dum ra ai” nga nna hpaji jaw mungga tsun ai.
Hpa-awn shalat jawng yu hpawng hta du sa ai mungshawa kanu kawa ni hte magam dap makan dap na magam gun yawng marai 600 daram sa du shanglawm ai hpe chye lu ai.
