Masat yan (11) Nursing hte Midwifery Diploma jawng hpaw hpawng galaw
Wunpawng Mungdan Shanglawt Asuya, Mungdan Hkamja Dap kaw nna hpaw sharin ai, Masat yan (11) Nursing hte Midwifery Diploma jawng hpaw hpawng hpe Ooctober shata 20 ya shani hkying 10:00am aten, Hkamja Lam hte Tsi Hpaji Sharin Jawng Gawknu kaw galaw la lu sai re.
Ginjaw Hkamja Dap (N/T Lit Hkam), Sarawun Singnan La Hkam kaw nna jawng hpaw mungga tsun ai hta
“Anhte a mungshawa ni hpe tsi gawn lajang ra ai, tsi hpaji hpe nchye nmai ai ngu hpe ya kaw nna, kraw lawang bawnu kaw dawk bang nna, hkaja mat wa ga, jawng lung ai ten hta tsi hpaji sha n-ga, kaga shinggan kaw na hpaji ni mung law law sharin ya na re majaw, myit lawm hkum lawm hte sharin hkam la mu” nga nna tsun ai.
Dai ning na Masat Yan (11) hta gaw amyu shayi ni sha rai nna, jawngma marai (90) re. Jawng lung ladaw hpe 3 ning masat da ai rai nna, sharin sara marai 34 hte sharin ginhpan 26 hpe sharin sa wa na re lam chye lu ai.
Hpawng lamang hta saw shaga da ai myitsu salang ni, sarawun ni, sharin sara/num ni hte jawngma yawng marai 185 daram shang lawm ai lam chye lu ai.
