Masat Yan (13) Hpu-Awn Shalat jawng yu hpawng galaw
Wunpawng Mungdan Shanglawt Asuya, Mungching Uphkang Dap kaw nna lit la nhtawm, Masat Yan (13) Hpu-Awn Shalat jawng yu hpawng hpe December shata 31 ya shani hkying 9:00am aten kaw nna hkying 11:30am aten du hkra DGA Hpung Wa Gawknu kaw galaw la lu sai re.
Salang Kaba Labya Tang Gun (DGA Lithkam) kaw nna jawng yu shatsam mungga tsun ai. hta “Sasana Sara Kaba rai nga ai Dr.Ola Han Son a numhtet ga hte maren anhte Kachin ni myit hkrum ai shani shang lawt lu na, Hkawhkam amyu tai na ngu ai ga malai a majaw kahkyin gumdin lam hpe la nga ga ai. Gahkyin gumdin lam hta kaja dik nna loi dik ai lit gaw lachyen lahka nkap ai mungshawa hpe hkungga tsawra ai lam re.
Dai majaw kahkyin gumdin lam hpe tinang a asak hte maren manu shadan ahkyak madung shatai nna myit masin kraw lawang atsam marai mahkra hte ninggun lagaw atsam marai mahkra hte zai byeng ya machye machyang mahkra hte mungshawa kata de ta tut shang sa wa mu ngu Karai Kasang a mying ningsang hpe gang let aja awa num htet dat ai” nga nna tsun ai.
Matut nna, Du Daju Minzai Zao Buk Htan (K.I.C Ningbaw Malai –II) kaw nna mung “Daini jawng yu la lu sai ni gaw ta tut hte mahkrum madup hta la kap nna, tsun shaga chye ga ngu na shawng tsun mayu ai. Madung gaw atsam hte myit marai ngang kang ra ai, myit marai ngangkang na ahkyak ai re. Wunpawng Mungdan Shanglawt Hpung Pati hte seng ai hpe mung hkaja nna lit la sa wa mu, dai hpe mare kahtawng buga shagu de gat hkai wa mu, kasi ningli hte woi awn sa wa mu, yawng e kasi la ging ai Salang Kaba byin tai sa wa mu, Ngai ngu ai myit masin hpe tawn kau da nna bungli galaw sa wa mu, Mungchying mungshawa ni kaw nna tsawra myit majing hkam la lu let magreng ai masen ai nden marai rawng ai, ningbaw ningla kaja, uphkang du salang kaja tai sa wa mu” nga nna hpaji jaw shatsam mungga tsun ai.
Jawng yu hpawng hta ningtawn kasi lu ai kumhpa, laika ningtawn ai kumhpa hte laksan kumhpa shagrau ai lamang ni mung galaw ai re.
Dai ni jawng yu ai jawngma yawng marai 86 rai nna, ya aten hta masat yan 14 jawngma ni yawng marai 184 mung naw sharin hkamla nga ai re hpe mung chye lu ai.
