Masat yan (13) Immigration jawng yu hpawng galaw
Wunpawng Mungdan Shanglawt Asuya, Mungchying Uphkang Dap, Immigration Makan Dap kaw na lit la hpaw sharin ya ai masat yan (13) masha pru shang gawnhkang (Immigration) jawng yu hpawng hpe July shata 27 ya jahpawt 9:00am aten hta, Alen Bum Hpungwa Ning-Awn Gawknu (DGA) kaw galaw ai lam chye lu ai.
Daini jawng yu ai jawngma yawng marai 52 rai nna, jawng hpe laiwa sai April shata praw 6 ya shani kaw nna hpaw sharin ai re lam chye lu ai.
Masha pru shang gawnhkang (Immigration) magam bungli gaw Wunpawng amyusha ni hte Wunpawng Mungdan sha ni hpe galoi mung, hta ni hta na ngang grin nga na matu, shat gayau ban zawn rai nna anhte Mungdan kata amyusha kata nbyin mat na matu Mungkan ndai hta anhte amyusha ni, zin tsawm rawt jat galu kaba wa na matu Immigration kaw na madung lit la nga ai re lam, Salang Kaba Hpunggan Zau Gun (Mungchying Uphkang Dap Ningtau Lithkam) kaw na jawng yu shatsam mungga hta tsun ai.
Kaba la ai amyusha ni a magam lit gunhpai sa wa ai hta, mungchying mungshawa hte kanawn mazum ai lam, mungchying mungshawa myit ngwi myit pyaw shim lum lam lu hkra shakut na anhte ni a lit re, laknak, hpyen hte sha myusha lam yan hpe gawgap ai nre, majan hte sha anhte dawdan ai nre, tara upadi hte anhte a ginra anhte a Mungdan, anhte a myusha ni hpe uphkang sa wa lu na matu re lam, Salang Kaba matut tsun ai.
Dai ni jawng yu ai jawngma ni hpe jawng yu lakmat shagrau jaw ai rai nna, ningtawn jawngma marai (3) hte sharin sara ni hpe mung laksan kumhpa shagrau jaw ai lam galaw ai.
Hpawng hta Mungchying Uphkang Dap magam gun ni, Magam Dap, Makan Dap shagu na saw shaga da ai magam gun ni, masat yan (13) Immigration jawngma ni shang lawm ai hte hpawng lamang hpe angwi apyaw galaw la lu sai lam chye lu ai.
