Masat yan (14) hpu-awn shalat arawng aya shagrau jawng yu hpawng galaw
Wunpawng Mungdan Shanglawt Asuya, Mungchying Uphkang Dap kaw nna hpaw sharin ai, masat yan (14) hpu-awn shalat arawng aya shagrau jawng yu hpawng hpe December shata (31) ya jahpawt hkying 7:00am aten kaw nna hkying 10:00am aten laman, DGA Hpungwa Ning-awn Gawknu wang kaw galaw ai lam chye lu ai.
Hpawng hta, DGA Amu Madu Salang Kaba Kamu Zau Mai kaw nna magam aming hti ai, DGA Lit Hkam Salang Kaba Labya Tang Gun kaw nna arawng aya shagrau lakmat jaw ya ai.
Arawng aya shagrau hkamla sai magam gun ni yawng marai (120) rai nna, dai ni shagrau jaw ai arawng aya gaw, Ninghtawn Ningtau Uphkang Du arawng aya re hpe chye lu ai.
Jawngma ningtawn kasi kumhpa hpe Shadang Zunwa La Ring hkamla lu ai rai nna, laika ningtawn kumhpa No. (1) hpe Shadang N-hpum La Mai, No. (2) kumhpa hpe Shadang Labya La Ja hte No. (3) kumhpa hpe Shadang Maji Seng Dan ni hkamla lu ai re.
Jawng yu sai magam gun ni hpe DGA Lit Hkam, Salang Kaba Labya Tang Gun kaw nna numhtet numra shatsam mungga jaw ya ai. Hpawng hta nawku hpung woi sara ni hte Magam Dap, Makan Dap de na saw shaga da ai magam gun ni sa du shang lawm ai.
December shata (30) ya shani hta gaw jawngma ni hpe ga shaka (Oath) jaw ai lamang hte jawng yu lakmat shagrau shatsam hpawng galaw la lu sai re. Masat yan (14) hpu-awn shalat jawng hpe lai wa sai 2019 ning, December shata (17) ya shani kaw nna hpaw sharin hpang ai re hpe chye lu ai.
