Masat yan (15) Hpu-awn shalat jawng yu hpawng galaw
Wunpawng Mungdan Shanglawt Asuya, Mungchying Uphkang Dap kaw nna lit la nhtawm, Masat yan (15) Hpu-awn Shalat jawng yu hpaw hpe June shata 14 ya shani hkying 9:00am aten hta Sinpraw Majoi Gawknu kaw galaw la lu sai.
Hpawng lamang hta jawng yu sai jawngma ni hpe jawng yu lakmat shagrau ai lam, Ningtawn kasi tai ai jawngma, laika ningtawn ai jawngma ni hpe mung masat masa kumhpa shagrau ya ai lam galaw ai.
Dai hpang Du Daju Lahpai Zau Raw (DGA Lit Hkam) kaw nna, jawng yu shatsam mungga tsun ai hta “Dai ni n-gun la sai hte ta tut bungli galaw sa wa ai hte jai lang sa wa ai rai yang myit da ga, shanglawt bungli galaw ai gaw pyaw poi sa ai hte nbung ai ngu ra ai, magam bungli hte ginra masa hta hkan nna, shakut shaja lai di lu ra ai, mung shawa ni hpe makawp maga na ngu ai mungchying uphkang dap a tsaw htum ai lit hpe ngang gang woi awn lu mu ga, prat hte bung kre ai hku nna, mung shawa hpe woi awn mayu ai myit hte sa wa ga” nga nna tsun ai.
Dai ni jawng yu sai jawngma yawng marai (287) tup rai nna, ya aten hta masat yang (16) jawngma ni mung naw sharin hkamla nga re hpe chye lu ai.
Lamang hta saw shaga da ai Magam Dap, Makan Dap shagu na myitsu salang ni, jawngma kanu kawa ni hte jawngma ni yaw angwi apyaw galaw ngut kre la lu sai lam chye lu ai.
