Masat yan ( 5 ) Hkamja Du jawng hpaw hpawng lamang galaw
Wunpawng Mungdan Shanglawt Asuya Mungdan Hkamja Dap kaw nna hpaw sharin ya ai Masat yan ( 5 ) Hkamja Du jawng hpaw hpawng lamang hpe Laiza Muklum Ginjaw Hkamja Dap, Wun Jat Gawknu kaw September shata praw 3 ya shani hkying 10:00am aten hta galaw ai lam chye lu ai.
Hkamja Du jawng hpaw sharin ai a yaw shada lam hpe Mungdan Hkamja Dap Ningtau Amu Madu, jawng wunkat yu reng Komiti ningbaw Du Kaba Kadang Manau Tu Awng ya na zawn tsun ai.
“Wunpawng amyusha ni sha n-ga mungshawa kaji kaba yawng ma hkra hkamja san seng lam hpe grau nna chye na hkan sa na matu, mungshawa ni hpe myusha hkamja lam htawn tsun dan na matu, mungshawa ni a san seng hkamja lam hpe grau nna htawn sharin shalat shalet ya na matu, mungshawa ni hpe hkamja lam gin len ya lu na matu hte anhte a mungshawa ni yawng san seng san pan lam hpe chye nna hkamja bawng ring ai wunpawng amyusha ni tai wa na matu yaw shada nna Hkamja Du jawng hpe pang hte pang hpe hpaw ai re” nga nna tsun ai.
Sharin ginhpan ni gaw Jinghpaw laika hte ka htung ka lai, Rawt malan labau, Ninggawn Mung masa hpe gaw da ai tara, Party hte seng ai gaw da ai tara, Htunghking hte ginru ginsa labau, Munchying Magam dap a gaw da ai ningpawt ninghpang tara, ningpawt ninghpang tsi gawn lajang hkye mawoi la bungli, hkum hkrang a gaw gap da ai hkrang hte seng ai, Malu masha ni hte seng ai, ma kaji ni hte seng ai, shangai chyinghkai ai lam, Nchye nmai ahkyak dik ai tsi ni hte seng ai lam, Kap bra ana ni hte seng ai lam, Ana ahkya a lam, Makawp maga tsi hte seng ai, mungshawa a hkamja lam, mungshawa hpe hpaji jaw ai lam, lu hka, jawng, dum nta san seng san pan lam hte seng ai lam, Makau grup yin san seng hkamja lam hte seng ai lam, Woi awn masa hte hpareng hparan ai ladat hpaji, hkamja dap a makan lit ni hpe lam jasan, hkamja dap rung hkri dun hte rung bungli ni, mungshawa hkamja lam hte mare buga san seng lam, NGO hte seng ai lam, Mungding tsi hte seng ai lam, Miwa ga hte laika ningpawt ninghpang, ningpawt ninghpang GPS hka ja lam hte seng ai, malu masha shim lam, Basic Computer laili laika hte seng ai lam ni hpe sharin ya na re nga nna Du Kaba Kadang Manau Tu Awng tsun ai.
Sharin hkamla na jawngma ni gaw Sinpraw ginwang ginjaw kaw na marai 9, Sinna ginwang ginjaw kaw na marai 4, dingdung ginwang ginjaw kaw na 6, dingda ginwang ginjaw kaw na marai 7, Sinpraw dingdung ginwang ginjaw kaw na marai 1, Uru ginwang ginjaw kaw na marai 4, ginjaw ginra ginwang ginjaw kaw na marai 5 jawngma yawng rai yang marai 36 tup re lam chye lu ai.
Masat yan 1,2,3 Hkamja Du jawng hpe sharin ladaw shata 6 hku nna hpaw sharin sai rai nhtawm, prat madang hta hkan nna chye ra galaw ra, chye gying chye ra ai lam ni grau nna rawt jat wa ai re majaw Masat yan 4 kaw nna gaw Hkamja Du jawng hpe sharin ladaw laning mi hku masat nna hpaw sharin sa wa ai re lam chye lu ai.
Masat yan ( 1 ) Hkamja Du jawng hpe 2005-2006 ning hta hpaw hpang sai rai nna, Masat yan ( 1 ) kaw nna masat yan ( 4 ) du hkra rai yang tara shang Hkamja Du ni yawng marai 146 tup rai sai lam chye lu ai.
