Masat yan 5 lahta tsang hkai rem ( Diploma ) hte masat Yan 16 ningpawt ninghpang hkai rem jawng yu hpawng galaw
Alen Bum Hkrukat Gawknu hta Masat yan 5 lahta tsang hkai rem ( Diploma ) hte masat Yan 16 ningpawt ninghpang hkai rem jawng yu hpawng hpe March shata 29 ya shani jahpawt hkying 9:00am kaw nna hkying 12:00pm aten du hkra galaw ai lam chye lu ai.
Ndai jawng yu hpawng hta Rev. Sumlut Gun seng kawn hpawng hpaw akyu hpyi ya ai. Kachin Independence Council ( KIC ) ningbaw malai, Amyu Sha Hpaji Masa Woi Awn Komiti Ningbaw Du Kaba Sumlut Gun Maw kaw nna chyip makup hkum dingnum hpaji jaw shatsam mungga tsun let ningtawn ai jawng ma ni hpe shagrau masat galaw nna lak san shagrau ai lam ni mung galaw ai.
2018-2019 ladaw a hkai rem jawng ma ni yawng marai 50 rai nhtawm daini jawng ngut kre la lu ai ni gaw ningpawt ninghpang hkai rem kaw na marai 11, lahta tsang hkai rem kaw na marai 11 re ai lam chye lu ai.
Hkairem jawng hpe hpan lahkawng garan da ai hta ningpawt ninghpang hkai rem jawng hpe 1997 ning hta Maijayang Wungau Bum kaw hpaw hpang ai rai nna lahta tsang hkai rem jawng hpe 2007 ning hta Awng Ja hkai sun wang kaw hpaw hpang ai re. Hpaw hpang ai kaw nna daini du hkra jawng yu ai jawng ma marai 200 jan du sai re lam chye lu ai.
Ningpawt ninghpang hkai rem jawng hta sharin hkamla na ni gaw jawng tsang 8 awng sai ni mai hka ja la nhtawm lahta tsang hkai rem ( Diploma ) hta sharin hkamla na ni gaw tsang 10 hpe htai awng ai ni rai ra na.
Hkai rem jawng hpaw hpang wa ai a yaw shada lam hpe Sara Kaba Kareng Brang Seng ya na zawn tsun dan ai. “ yaw shada ai lam hta lam 7 nga ai. Ramma ni hpung grin ai hpaji sharin la lu na matu, Hkai rem bungli hpuawn shalat la lu na matu, Kung kyang ai hkai rem hpaji ninghkring shalat la lu na matu, Ladat nnan, nli nnan shapraw la lu na matu, Hkai rem hta mahta nna mungdan sut masa ngang grin wa lu na matu, Mungdan hta malu masha shim lam nga na matu ngu yaw shada ga ai. Anhte myu sha ni gaw 100% lam shadang kaw na 85% gaw hkai lu hkai sha ai ni re ga ai majaw yawng a matu hpung grin ai hpaji lu na matu ngu yaw shada let woi de ga ai” nga nna tsun dan ai.
Matut nna mung daini jawng yu ai ni hpe du wa na April shata kawn japan de sa bawng ban nna maigan de hpaji hkaja la shangun rai let anhte a ginra hte htap htuk ai de du wa hkra, lu sharawt hkra galaw na masing ni mung nga ga ai nga nna Sara Kaba matut tsun dan ai.
Daini na jawng yu hpawng hta Magam Dap, Makan Dap hte mung chying mung shawa marai 200 jan sa du shang lawm let hkying 12:00pm aten hta hpawng ngut kre la lu sai lam chye lu ai.
