Masat yan (5) Sinpraw Majoi Htunghking Shingni Jawng yu hpawng lamang galaw

Wunpawng Mungdan Shanglawt Asuya, Htunghking Hte Laili Laika Magam Dap kaw nna yu reng nhtawm, Ningbaw Kaba Nban La a matsun hte hpaw sharin ai, Masat yan (5) Sinpraw Majoi Htunghking Shingni Jawng yu hpawng hpe, September shata (10) ya jahpawt hkying 9:30am aten hta, Sinpraw Majoi Gawknu hta galaw la lu sai re.

Hpawng hta nawku hpung woi sara ni akyu hpyi ap ya ai hpang, Sinpraw Majoi Shingni Hpung a sumtang hte yaw shada ai lam, chyeju dum ai lam hpe, Htunghking Hte Laili Laika Magam Dap, Sinpraw Majoi Htunghking Shingni Jawng hpe yu lit la nga ai, Saranum Kaba Nding Tawng Ra kaw nna ndai zawn tsun ai.

“Sinpraw Majoi Shingni Hpung hpe 2006 ning kaw na hpaw hpang wa ai re. 2013-14 ning hta gaw, salang ni a masing hte jawng hpe gan jahkring da ai lam mung nga lai wa sai re. Dai hpang 2019 ning September shata kaw nna jawng bai hpaw wa sai hku re. Ndai zawn shingni hte seng ai hpaji ni hpe manu chye shadan ai ni a woi awn lam madun la ai chyeju a majaw re ai.

Dai majaw Shanglawt Asuya hte ndai magam bungli hpe madu tai lit la ya ai Ningbaw Kaba hpe mung grai chyeju dum ai. Ginjaw Htunghking Hte Laili Laika Magam Dap hte Htoi Gender ni, lam amyu myu hku nna garum la ai sharin ya ai ni yawng hpe mung grai chyeju dum ai lam tsun mayu ai.

Anhte Wunpawng (Kachin) ni galaw ra ai hkan sa ra ai Htunghking Ningli hpe Karai Kasang gaw jaw da chyalu re ai. Dai Htunghking Ningli ni grai manu dan ai raitim, anhte manu n chye shadan ai hku nna nga kau ai nrai u ga, anhte a Htunghking Ningli ni nmat mat u ga, mat mat hkyen ai ni hpe bai tam sawk shinggyin shatsawm shalat la nhtawm, mungkan de shadan shadawng na matu, mungkan kaw na Shingni ni hte maren awng dang rawt jat galu kaba wa hkra ngu ai yaw shada lam kaba hte Sinpraw Majoi ngu ai hpe galaw sa wa ai lam re ai” nga nna tsun ai.

Jawng hta sharin ya ai gyinhpan ni gaw, Ka manawt ai hpan hkum, music nsi note, madum hpan amyu myu, Htunghking hte seng ai ginru ginsa labau hpaji ni, num wawn numla hte seng ai ni, Ja hpaga hte seng ai ni, majun hte seng ai ni hte lata hpaji hpan amyu myu hte Miwa laika hpe mung sharin ya ai rai nna, shinggyim masha langai, ramma langai hta chye ging chye mai ai hpaji ni hpe sharin ya nga ai lam chye lu ai.

Dai ni jawng yu lakmat shagru hkamla sai jawngma ni gaw, La marai (10) Num marai (11) yawng marai (21) rai nna, Sinpraw Majoi Shingni Jawng hta sharin hkamla ngut sai jawngma yawng marai (100) jan nga sai lam chye lu ai.

Jawng yu sai jawngma ni kaw nna chyeju dum ga tsun ai dai hpang, Salang Kaba Chyana Zau Awn (Htunghking Hte Laili Laika Magam Dap Lit Hkam) kaw nna mung, jawng yu sai jawngma ni hpe numhtet numra shatsam mungga jaw ai lam galaw ai.

Jawng yu sai jawngma nkau mi gaw, tinang a mare buga de wa nhtawm, bai wa sharin ya ai lam ni galaw na re, sharin ginhpan ni hta ningtawn ai jawngma nkau mi gaw jawng hta sha bai sharin karum ap nawng ai lam ni galaw na re hpe chye lu ai.

Masat yan (6) Sinpraw Majoi Htunghking Shingni Jawng hta lung na jawngma ni gaw, tsang (10) lung yu sai wa rai na, asak 17 kaw na 23 ning lapran rai na, jawng lung ladaw (2) ning rai nna, jawng mying hpe October shata 15 ya shani kaw na jawng mying hkap la hpang nhtawm, November shata praw 1 ya shani kaw nna sharin hpang sana re lam, Saranum Kaba Nding Tawng Ra tsun ai.

Masat yan (5) Sinpraw Majoi Htunghking Shingni Jawng yu hpawng hta Magam Dap, Makan Dap shagu na myit su kanu kawa ni, nawku hpung woi sara ni, saw shaga da ai kanu kawa ni yawng marai (200) jan sa du shang lawm ai lam chye lu ai.