Masat Yan (6) Hkamja Du Jawng yu hpawng galaw
Wunpawng Mungdan Shanglawt Asuya, Ginjaw Hkamja Dap kaw na hpaw sharin ai, Masat Yan (6) Hkamja Du jawng yu hpawng hpe May shata 20 ya jahpawt hkying 9:00am aten hta Wunjat Gawknu kaw galaw la lu sai re.
Hpawng hta jawng yu lakmat shagrau ai lam, jawng ma ni chyeju dum ga tsun ai lam, magam gun nnan ni hpe magam aming hti ndau ai lam ni galaw ai.
Ginjaw Hkamja Dap Ningtau Lit Hkam, Srw. Singnan La Hkam shatsam mungga tsun ai hta “Chye gring chye mai ai hpaji ni hpe sharin hkamla ngut sai majaw, tinang chye da ai hpaji hpe atsawm akyu chye jashawn ai ni byin tai wa lu na, mungdan magam bungli galaw ai lam hta mung, kangka ai ni byin tai lu na, mungdan hte mungshawa a matu hkamja lam hpe yu lakawn ai hkamja du ni byin tai wa u ga” nga nna tsun ai.
Ndai wunkat hpe lai wa sai 2022 ning July shata 23 ya shani hpaw sharin sa wa ai rai nna, sharin ginhpan 18 hpe sharin ya nhtawm, jawngma yawng marai (36) tup jawng yu la lu sai re.
Jawng yu hpawng hta saw shaga da ai Magam Dap, Makan Dap shagu na myitsu salang ni hte jawngma kanu kawa ni sa du shang lawm ai hte galaw la lu sai lam chye lu ai.
