Masat yan (6) Sinpraw Majoi Htunghking Shingni Jawng hpaw hpawng galaw
Masat yan (6) Sinpraw Majoi Htunghking Shingni Jawng hpaw hpawng hpe, November shata 29 ya jahpawt hkying 10:00am aten hta Alen Bum kaw galaw ai lam chye lu ai.
Jawng hpe Wunpawng Mungdan Shanglawt Kongsi, Ningbaw Kaba Nban La kaw nna yu reng let, ra ai ja gumhpraw ni hpe laksan jahkrat ya nhtawm shi a masing kata kaw, Htunghking Hte Laili Laika Magam Dap gaw tatut yu reng uphkang ai lam ni hpe galaw ai re lam, Salang Kaba Chyana Zau Awn tsun ai.
Sinpraw Majoi Htunghking Shingni Jawng hta sharin hkamla na jawngma yawng marai 20 tup rai nna, jawng lung ladaw 2 ning re hpe chye lu ai.
Jawng hta sharin ya na ginhpan (Subject) 9 garan da ai, (1) Wunpawng Htunghking Shingni yungwi mahku nsen ni hpe ka hkrang hte shapraw ai lam (2) Ginru ginsa labau (3) Numwawn Numla Htunghking lailen majun ni (4) Htunghking madum sumhpa (5) Ninggawn Mungmasa (6) Rawt Malan Labau (7) Nsi note (8) Manau nau shawng hpaji (9) Jinghpaw laika kahtung kalai hte Miwa laika ni rai nga ai.
Subject kaba 9 a kata kaw buhpun mawn sumli hpaji, pali shit hpaji, nampan mawn hpaji, hkumhkrang shakya hpaji, lata hpaji amyu myu hte laksan lakjet ni mung lawm ai lam chye lu ai.
Jawng a yaw shada lam hte hkalum shatsam mungga hpe Htunghking Hte Laili Laika Magam Dap Lit Hkam, Salang Kaba Chyana Zau Awn kaw nna ndai zawn tsun ai.
“Dai ni anhte Amyusha ni a Htunghking jawng ngu ai maga de byin lu hkra ngu ai re. Ramma ni mare buga de wa ai shaloi Htunghking Mungman lam hta shingdep shingtau lu na lam hte dai kaw shang lawm, woi awn chye wa na matu, Sinpraw Majoi Htunghking Jawng hpe myit lawm hkum lawm sharin hka ja wa jang, ningpawt ninghpang hpe chye da jang grau nna masan sa ai lam, awng dang ai lam madang tsaw ai de sharawt sa lu na re.
Ya du sa ai ramma ni nanhte marai 20 gaw jawng dat du hkra, shakut shaja tara hkan nna tinang a mare buga de bai wa let, hpang e bai hpaw na masat yan (7) a matu, manang ni hpe n gun jaw ai lam, gahkyin gumdin ai lam shanglawm ai lam rai jang, anhte a Htunghking Shingni hte seng ai lam gaw, grau grau rawt jat wa let, Wunpawng sha ni a Htunghking masa lam lahpa galai la na gaw nanhte ramma ni a lata kaw re” nga nna tsun ai.
Masat yan (5) a shawng daw hta gaw, Sinpraw Majoi Htunghking Shingni Hpung hku sa ai, masat yan (6) dai ning kaw nna she Jawng hku hpaw sa wa lu ai re lam, Sinpraw Majoi Htunghking Shingni Jawng Yureng Komiti Ningtau Ningbaw Saranum Kaba Nding Tawng Ra tsun ai.
Sinpraw Majoi Htunghking Shingni Hpung hta jawngma yawng marai 104 sharin hkamla ngut sai lam nga sai re. Sinpraw Majoi Htunghking Shingni Jawng hta sa lung na ni gaw, laika tsang 10 madang nga nna Htunghking hpe myit lawm ai wa, asak 16 ning kawn 23 ning lapran hpe hkapla ai re lam, jawng komiti kaw na chye lu ai.
