Masat Yan (7) Basic Media wunkat yu hpawng galaw
Wunpawng Mungdan Shanglawt Asuya, Shiga Magam Dap Ginjaw Rung kaw nna hpaw sharin ya nga ai Masat Yan (7) Basic Media wunkat yu hpawng hpe May shata praw (1) ya jahpawt hkying 10:00am aten hta, Shiga Magam Dap zuphpawng gawk kaw galaw la lu sai lam chye lu ai.
Hpawng lamang hta daini wunkat yu ai ramma ni hpe Shiga Magam Dap Lithkam Du Kaba Nhpang Naw Bu kaw nna wunkat yu shagrau lakmat shagrau jaw ai hte Shiga Magam Dap kata shiga ka ningtawn ai magam gun ni marai (3) hpe mung masat masa kumhpa shagrau sha-a ai re.
Daini Basic Media wunkat yu sai ramma ni yawng marai 13 rai nna, ndai ramma ni yawng gaw, Shiga Magam Dap kata magam bungli gunhpai sa wa na ramma ni re lam chye lu ai.
Wunkat hpe February shata 11 ya shani kaw nna April shata htum du hkra sharin ya ai rai nna, wunkat sharin sara/num ni mung Shiga Magam Dap kaw na magam gun hpu-awn tsang ni kawn sharin ya ai re.
Shiga Magam Dap kaw nna hpaw sharin ya ai Basic Media wunkat Masat yan (1) kaw na Masat yan (7) du hkra rai yang, wunkat yu ai yawng marai 138 nga sai lam chye lu ai.
