Masat yan ( 7 ) shangai chyinghkai ( Midwife ) jawng yu hpawng galaw
KIO ginjaw hkamja dap a masat yan ( 7 ) shangai chyinghkai hpaji ( Midwife ) jawng yu hpawng hpe, June 29 ya hkying 10:00am aten hta Laiza Muklum mungshawa tsi rung wang, Wunjat Gawknu kaw galaw ai lam chye lu ai.
Jawng yu ai jawngma yawng marai ( 70 ) rai nna, Ga shaka hkamla ai lam hte jawng yu lakmat hpe shagrau sha a jaw ai lam mung galaw ai.
Wunpawng Mungdan Shanglawt Asuya kaw nna, tsi hpaji hpe Nursing Diploma hte Midwife hpe sharin nga ai hta Nursing Diploma jawng hpe ( 2 ) ning, Midwife jawng hpe laning mi chyen, masat nna sharin nga ai, shangai chyinghkai hpaji hpe madang dep ai hku nna sharin hkamla lu na matu, laiwa sai 2004 ning kaw nna hpaw hpang wa sai lam, Mungdan Hkamja Dap Lit Hkam Du kaba Lahpai Hing Wawm tsun ai kawn chye lu ai.
2001 ning kawn 2017 ning laman KIO asuya kaw nna tsi sara/num yawng marai ( 1,000 ) jan hpe sharin shalat la lu sai hpe mung chye lu ai.
