Masat yan (8) Nursing Diploma janmau shagrau hpawng galaw
Wunpawng Mungdan Shanglawt Asuya Mungdan Hkamja Dap Ginjaw Rung kaw nna lit la hpaw sharin ya nga ai masat yan (8) Nursing Diploma jawng janmau shagrau hpawng hpe February shata 29 ya jahpawt hkying 10:00am aten hta Ginjaw Hkamja Dap Wunjat Gawknu kaw galaw ai lam chye lu ai.
Ginjaw Hkamja Dap Lit Hkam Du Up Jum Lahpai Hing Wawm kaw nna jawng yu hpawng mungga shaga nhtawm, tara shang janmau ap ya ai lam galaw ai.
Saranum Kaba Professor Lahkri Hkawn Nu kaw nna jawng yu ai jawngma ni hpe numhtet shatsam mungga shaga ai rai nna, masat yan (8) Nursing Diploma jawng awng pru ai jawngma ni yawng marai 40 hpe jawng awng lakmat shagrau sha-a lam galaw ai.
Wunpawng Mungdan Shanglawt Asuya kaw nna, Nursing Diploma janmau hpe shawng ningnan lang jaw ai rai nna, laiwa sai aten hta gaw jawng yu lakmat Certificate hku nna sha jaw ai lam chye lu ai.
Du Daju Zawngbuk Htan (Ningbaw Malai II) kaw nna mung, dai ni jawng yu ai jawngma ni hpe hpaji jaw shatsam mungga shaga ai. Dai hpang tsi jawng hpe lam amyu myu hku nna garum ya ai Mandalay KBC Buga Hpung masha ni hpe mung masat masa kumhpa shagrau ai lam galaw ai.
Jawng yu hpawng lamang hta Du Daju Zawngbuk Htan (Ningbaw Malai II) hte rau Magam Dap, Makan Dap shagu na magam gun ni, makam masham hpung woi sara ni tsi jawngma ni hte jawngma kanu kawa ni yawng marai 700 daram sa du shang lawm ai lam chye lu ai.
Masat yan (8) Nursing Diploma jawng hpe 2017 ning November shata 14 ya shani kaw nna hpaw sharin ya ai rai nna, 2020 ning February shata 29 ya shani du hkra rai yang jawng lung ladaw 2 ning shata 3 tup re hpe chye lu ai.
Nursing Diploma jawng hta shingan janmau lu da ai ni, tsang 10 awng nna hkamja lam nga ai ni hpe sha hkapla ai rai nna, tsang 10 n awng nna hkamja lam nga ai ni hpe gaw, shangai chyinghkai hpaji hpe sharin ya ai re lam chye lu ai.
Masat yan (9) Nursing Diploma hte Midwife tsi jawng hpe 2019 ning October shata praw 5 ya shani kawn hpaw sharin nga sai rai nna, Nursing Diploma jawngma hte Midwife jawngma yawng marai 110 tup sharin hkam la nga ai hpe mung matut chye lu ai.
