Masat Yan (8) Nursing Diploma jawng Saranum tsi bawchyawp ap ya ai hte ga shaka hkam la hpawng galaw
Masat Yan (8) Nursing Diploma jawng Saranum tsi bawchyawp ap ya ai hte ga shaka hkam la hpawng lamang hpe Ginjaw Hkamja Dap, Wunjat Gawknu kaw February shata 28 ya jahpawt hkying 10:00am aten hta galaw ai lam chye lu ai.
Dai ni na hpawng lamang hta Saranum kaba Professor Lahkri Hkawn Nu kaw nna, Trained Nurse Capping a lachyum hte Trained nurse ni a tatut bungli, lit ni a lam hpe sang lang dan ai lam galaw ai.
Du Jum Sumdu Htu Lum (Tsi Jawng Up) kaw nna, tsi bawchyawp shagup ap ya ai lamang hpe woi awn galaw ai rai nna, Saranum tsi bawchyawp hpe Saranum kaba N.S Kumshin Awn Lu kaw nna gup shagrau ya ai lam galaw ai.
Ga shaka hkam la hpawng hpe Du Up N-Gan Naw Seng (Jawng Wunkat Matsan Du) kaw nna woi galaw ai rai nhtawm, ningtawn ai jawngma marai 3 hpe ningtawn kumhpa masat shagrau ai lam galaw ai hta No.1 ningtawn kumhpa hpe Shayi Maran Nu Pan, No.2 ningtawn kumhpa hpe Shayi Lahpai Ja Ra hte No.3 ningtawn kumhpa hpe Shayi Nhkum Mun Mai ni kaw nna hkalam lu ai re lam chye lu ai.
Ginjaw Hkamja Dap Ningtau Amu Madu Du Up Kadang Manau Tu Awng kaw nna Hpaji jaw shatsam mungga shaga ai rai nna, hpawng lamang hta Magam dap, Makan dap shagu na magam gun ni, jawngma kanu kawa ni hte tsi hpaji hpe sharin hkamla nga ai Sara/num ni, du sa ai mungshawa yawng marai 400 daram sa du shang lawm ai lam chye lu ai.
