Masat yan ( 8 ) shangai chyinghkai jawng yu hpawng galaw
Masat yan ( 8 ) shangai chyinghkai ( Midwife ) jawng yu hpawng hpe Laiza Muklum Ginjaw Hkamja Dap, Wun Jat gawknu kaw September shata 28 ya shani hkying 10:00am aten hta galaw ai lam chye lu ai.
Jawng yu hpawng hta shawng nnan wunpawng mungdan dawng hkawn hpe baw gum hkungga jaw ai. Dai hpang Hkamja dap Ningtau Amu Madu Du up Kadang Manau Tu Awng kaw nna hpawng hpaw mungga shaga ai hte Hkam ja dap Ningtau lit hkam Lat Du Up jum Lamai Seng Hkum kaw nna jawng yu shatsam mungga shaga ai, Ninggawn Ningtau Amu Madu Salang Kaba Labang Doi Pyi Sa hku nna mung hpaji jaw numhtet mungga shaga ai.
Shangai chyinghkai tsi hpaji sharin jawng hta nchye nmai rai nga ai ningpawt ninghpang hpyen htung lai, anhte myusha ni yawng chyeging, chye nan chye da ra ai ninggawn mung masa, wunpawng Htunghkring, wunpang ni a htung lai masa hte ta tut yawng jai lang nga ai jinghpaw laika ni hpe sharin ya ai. Sharin ga baw rai nga ai shangai chyinghkai jawng ngu ai hta hkamja san seng lam mung ahkyak ai re majaw, hkum ding dek a hkamja san seng lam, mungshawa hkamja lam ni hpe mung hkum tsup hkra sharin ya ai re lam Hkamja dap Ningtau Amu Madu Du Up Kadang Manau Tu Awng tsun ai.
Daini jawng yu ai jawngma ni gaw la 6, num 43, yawng marai 49 tup re. Midwife shangai chyinghkai jawng hpe laning mi shata 6 masat da ai raitim yak hkak dut dang ai lam ni a majaw, laning mi shata 10 sharin hkaja la lu sai re. Nursing jawng hpe 2 ning masat da ai re majaw Nursing jawng hpe gaw matut nna naw sharin nga ai re nga nna Ningtau Amu Madu Du Kaba matut tsun ai.
Masat yan 8 shangai chyinghkai jawng hpe 2017 ning November shata 14 ya shani hpaw hpang ai re lam chye lu ai.
Midwife jawng yu ai Sara/saranum nnan ni yawng hpe jawng awng lak mat hte tsi gupchyawp shagrau ai lam galaw ai. Theory hte Practical hta ningtawn ai jawngma ni hpe mung masat shagrau ai lam galaw ai hta, No. 1 hpe Shayi Maran Roi Wawm, No.2 hpe Shayi Nhpu Lu Mai, No.3 hpe Shayi Zatau Dau Tse ni hkam la lu ai rai nna, jawngma ningtawn kasi hpe Shayi Hkumhpum Nang Lum hku nna hkam la lu ai lam chye lu ai.
Daini na jawng yu hpawng hta Mungdan Magam dap, makan dap shagu na magam gun kaji kaba yawng, jawngma kanu kawa ni, tsi sara saranum ni, hpung magam gun ni hte mungchying mungshawa ni yawng marai 500 daram sa du shagrau lawm ai lam chye lu ai.
