Masat yan (9) Nursing Diploma jawng, janmau shagrau hpawng galaw
Wunpawng Mungdan Shanglawt Asuya, Ginjaw Hkamja Dap kaw nna hpaw sharin ya ai masat yan (9) Nursing Diploma jawng, janmau shagrau hpawng hpe Laiza Muklum, Ginjaw Hkamja Dap, Wunjat Gawknu kaw October shata (16) ya shani hkying 10:00am aten hta galaw ai lam chye lu ai.
Dai ni janmau shagrau hkrum sai sara/num ni yawng marai 55 tup rai nna, nursing diploma jawng awng shagrau lakmat hpe Tsi Jawng Up, Du Jum Sumdu Htu Lum kaw nna shagrau jaw ai hte Wunpawng Mungdan Shanglawt Kongsi (KIC) Amu Madu, Du Daju Lahpai Zau Raw kaw nna hpaji jaw shatsam mungga shaga ai re.
Tsi jawng hpe lai wa sai 2019 ning, October shata kaw nna hpaw sharin nhtawm, tsi hpaji hpe madung sharin achyin ya ai rai nna, hpyen htung hkungga la ra lam, Ninggawn mungmasa lam yan hte rawt malan labau, htunghking hte labau, Jinghpaw laika ka htung ka lai hte kaga chye ging chye mai ai hpaji ni hpe sharin achyin ya ai sha n-ga, Midwife tsi jawng hpe mung diploma madang de du hkra hpaw sharin sa wa na re lam matut chye lu ai.
Hpawng lamang hta, KIC Amu Madu hte rau, makam masham hpung woi sara ni, Magam Dap, Makan Dap de na magam gun ni sa du shang lawm ai rai nna, lamang hpe COVID-19 ana zinli makawp ninghkap tara hte maren angwi apyaw galaw la lu sai lam chye lu ai.
